АСТАНА. KAZINFORM – Қазақстандық, әлемнің 274-ракеткасы Зарина Дияс Пальма-дель-Рио (Испания) ITF W50 турнирінің екінші айналымына шықты.
Жарыстың 4-ракеткасы болып тіркелген қазақстандық теннисші бастапқы кездесуін дүниежүзілік рейтингіде 250-орында тұрған португалиялық Матилде Жоржемен өткізді.
Зарина 6:3, 6:1 есебімен қарсыласын ойсырата ұтты.
Ойын сағат жарымнан астам уақытқа созылды.
Зарина Дияс ширек финалға шығу үшін әлемнің 551-ракеткасы, чехиялық Тереза Мартинцовамен таласады. Ол алғашқы айналымда тартысты матчта рейтингіде 392-сатыдағы Польша өкілі Мартина Кубканы жолдан тайдырды – 6:4, 7:6 (9:7).
Қазақстандық теннисші осыған дейін Таусте (Испания) ITF W35 жарысының жеңімпазы атанған еді.
Еске сала кетейік, бұдан бұрын Анна Данилинаның Ұлыбританиядағы жарыстың жартылай финалына өткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).