НҰР-СҰЛТАН. ҚазАқпарат - Қазақстандық Зарина Дияс Истбурнның негізгі турниріне өте алмады, деп хабарлайды ҚазАқпарат тілшісі.
Дүниежүзілік рейтингте 89-орында тұрған З.Дияс іріктеу сайыстарының финалында әлемнің 59-ракеткасы, ресейлік Вероника Кудерметовамен кездесті. Бірінші партия тай-брейкке дейін жетіп, онда ресейлік теннисшінің жолы болды - 7:6 (7:4). Екінші сетте Зарина 4:1 есебімен алда тұрды. Алайда сол басымдылығын пайдалана алмады. Мұнда да В.Кудерметова сәтті ойнады - 7:5.
Тартысты бәсеке 1 сағат 49 минутқа созылды.
Осылайша З.Дияс Истбурнның негізгі жарысынан тыс қалды. Дегенмен, ендігі мақсат - 1-14 шілде аралығында өтетін Уимблдон жарысында сәтті өнер көрсету. Алдағы аптада осы турнирдің іріктеу сындары басталады.
Ерлер арасында Истбурнның іріктеу сайысына Александр Бублик қатысуда. Ол бастапқы кездесуін канадалық Стивен Диаспен өткізеді.
Еске сала кетейік, бұдан бұрын Юлия Путинцева Бирмингем турнирінің жартылай финалына өте алмаған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).