АСТАНА. KAZINFORM – Қазақстандық теннисші, әлемнің 246-ракеткасы Зарина Дияс Сейшал (Португалия) ITF W50 турнирінің ширек финалына жолдама алды.
Жарыстың 8-ракеткасы ретінде тіркелген Зарина екінші айналымда дүниежүзілік рейтингіде 275-орында тұрған жапониялық Мэй Ямагутиге қарсы келді.
Бірінші партияда З.Дияс 4:1 есебімен алға шыққанымен, беріп қойды – 4:6. Дегенмен екіншісінде есе қайырды – 6:3.
Үшінші, шешуші сетте қазақстандық спортшы 5:1 есебімен алға кетті. Содан кейін матчты кезекті брейкпен түйіндеді – 6:1. Тартысты өткен бәсеке 2 сағат 9 минутқа созылды.
Зарина Дияс жартылай финалға шығу үшін әлемнің 217-ракеткасы, чехиялық Габриэла-Андреа Кнутсонмен шеберлік таластырады.
Тағы бір қазақстандық, әлемнің 306-ракеткасы Жібек Құламбаева Гаага (Нидерланд) ITF W75 турнирінің ширек финалынан тыс қалды. Ол екінші айналымда рейтингіде 521-сатыдағы франциялық, 20 жастағы Женни Лимнен жеңіліс тапты – 1:6, 6:3, 3:6.
Еске сала кетейік, бұдан бұрын Зарина Диястың Португалиядағы жарыста қарсыласын ойсырата жеңгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).