АСТАНА. KAZINFORM – Қазақстандық теннисші Зарина Дияс Куруме (Жапония) ITF W75 турнирін жеңіспен бастады.
Отандасымыз жарақатына байланысты екі жылдық үзілістен кейін кортқа биыл ғана оралған еді. Курумиде алғашқы айналымда Зарина әлемнің 410-ракеткасы, 24 жастағы Сакура Хосогимен сынға түсті.
Бірінші партияда қазақстандық спортшы 6:4 есебімен қорытындыласа, екіншісінде Хосоги қарымта қайырды – 6:3.
Үшінші, шешуші сетте Зарина 5:2 есебімен алға шығып, матчқа екі рет доп бергенде, жеті матчболын пайдалана алмады. Дегенмен тай-брейкте жеңісті жұлып алды – 7:6 (7:2). Текетіреспен өткен матч 2 сағат 25 минутқа созылды.
Зарина Дияс ширек финалға шығу үшін әлемнің 214-ракеткасы, Таиланд өкілі, 21 жастағы Мананчэйа Савангкаевпен таласады.
Еске сала кетейік, бұдан бұрын Жібек Құламбаеваның Загребте жарыстың үшінші ракеткасын жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).