Зерттеу: Африка тұрғындары еуропалықтардан екі есе көп садақа береді

АСТАНА. KAZINFORM —  Африка — әлемдегі ең жомарт құрлық. Бұл тек қайырымдылыққа қатысатын адамдардың саны жағынан ғана емес, сонымен қатар табыстың белгілі бір бөлігін қайырымдылыққа бөлу үлесі бойынша да дәлелденген, деп хабарлайды DW басылымы.

Ал еуропалықтар қайырымдылыққа салыстырмалы түрде аз қаражат бөледі. Сонымен қатар, олардың көмек көрсету мақсаттары да өзгеше.

Бай елдердің тұрғындары қайырымдылыққа мұқтаж елдердің халқына қарағанда әлдеқайда аз қаражат жұмсайды. Бұл — британдық Charities Aid Foundation қоры дайындаған «Әлемдік қайырымдылық туралы есептің» мәліметтері негізінде жасалған тұжырым.

Аталған есепте 2024 жылы жеке қайырымдылықтың жаһандық үрдістері мен адамдарды садақа беруге ынталандыратын факторлар зерттелген. Жомарттық деңгейі табысқа шаққандағы қайырымдылық көлеміне негізделген. Зерттеу әлемнің 101 елінде 50 мыңнан астам адам қатысқан сауалнама нәтижелері бойынша жасалған.

Әлемдегі ең жомарт құрлық — Африка

Есепке сәйкес, былтыр дүние жүзі бойынша сауалнамаға қатысқандардың 64%-ы қайырымдылыққа атсалысқан. Олардың 38%-ы мұқтаж адамдарға немесе отбасыларға (достары мен туыстарынан басқа) тікелей қаржылай көмек берген. 36%-ы қайырымдылық ұйымдарына, ал 25%-ы шіркеу секілді діни мекемелерге ақша бөлген.

Аймақтық тұрғыда қарасақ, қайырымдылыққа ең көп қатысқан — Африка тұрғындары (72%). Одан кейін — Азия (69%), Океания (66%), Еуропа (59%) және Солтүстік пен Оңтүстік Америка (әрқайсысы 56%).

Кім қанша бөлігін қайырымдылыққа жұмсайды

Әлем бойынша орта есеппен адамдар өз табысының 1,04%-ын қайырымдылыққа жұмсайды. Ал табысы төмен елдердегі тұрғындар бұл көрсеткіш бойынша көш бастап тұр — олар 1,45% үлесін садақаға береді. Ал табысы жоғары елдерде бұл көрсеткіш бар болғаны 0,70%.

Мәселен, африкалықтар орта есеппен табысының 1,54%-ын қайырымдылыққа жұмсайды. Ал еуропалықтар — тек 0,64%. Тіпті, кейбір дамыған елдерде бұл көрсеткіш одан да төмен. Мысалы:

• Франция — 0,45%

• Германия — 0,39%

• Жапония — 0,16%

Әлемдегі ең жомарт ел — Нигерия. Бұл Батыс Африкадағы халық саны ең көп мемлекетте тұрғындар табысының орта есеппен 2,83%-ын қайырымдылыққа, діни мақсаттарға немесе мұқтаж жандарға тікелей көмектесуге арнайды.

Қай жастағы адамдар көбірек садақа береді?

Жаһандық деңгейде 35–44 жас аралығындағы адамдар табысының 1,18%-ын қайырымдылыққа жұмсаса, 65 жастан асқандар бұл мақсатқа 0,83% ғана бөледі. Яғни, орта буын өкілдері үлкендерге қарағанда шамамен 1,5 есе жомарт.

Адамдарды қайырымдылыққа не итермелейді?

Сауалнамаға жауап бергендердің айтуынша, қайырымдылық жасауға итермелеген негізгі себептер:

• көмек бермесе, өздерін кінәлі сезінуі мүмкін деген ішкі сезім;

• қоғам алдындағы жауапкершілік;

• діни сенімдер;

• жергілікті қауымдастықты қолдау ниеті;

• өзгелерге үлгі болуға деген ұмтылыс.

Респонденттердің 65%-ы көмекті жүрек қалауымен жасайтынын айтқан. 18%-ы — жаңалықтардан көрген мәселелерге үн қатса, 14%-ы — әлеуметтік желі арқылы көмекке мұқтаж жандарды тапқан көрінеді.

Көбіне адамдар жергілікті қайырымдылық ұйымдарына сенім білдіреді. Ұлттық және халықаралық қорларға қарағанда, оларға көбірек қаражат бөледі.

Балалар мен жастарға көмектесу — жаһандық басымдық

Әлемнің барлық өңірінде балалар мен жастарға бағытталған қайырымдылық бастамалар ең маңызды болып саналады.

• Африкада — діни ұйымдарға қолдау кең таралған.

• Азияда — кедейлікпен күреске көбірек назар аударылады.

• Еуропада — гуманитарлық көмек, денсаулық сақтау, балалар мен жастарға қолдау, кедейлер мен жануарларға көмектесу алдыңғы қатарда.

• Оңтүстік Америкада — болашақ ұрпаққа қолдау көрсету басты орында.

• Солтүстік Америкада — үйсіздікпен күрес бірінші орында тұр.

• Океанияда — денсаулық сақтау саласындағы қайырымдылық ұйымдары ең танымал.

Бұған дейін Microsoft-тың негізін қалаушы Билл Гейтс алдағы жиырма жыл ішінде өзінің байлығының 99 пайызын қайырымдылыққа жұмсауға шешім қабылдағанын хабарлады.