Зейнеткерлердің несиесі кешіріле ме — Үкімет жауабы

АСТАНА. KAZINFORM — Наурыз айының басында Мәжіліс депутаттары Премьер-министрдің орынбасары Ермек Көшербаевтың атына зейнетақы төлемдерін заңнамадан «кіріс көзі» ретінде алып тастап, зейнеткерлердің қарызын кешіру керектігі туралы сауал жолдаған болатын.

Вице-премьердің жауабында зейнеткерлер де кез келген Қазақстан азаматы сияқты жеке тұлғаның соттан тыс банкроттығы арқылы қарыз проблемасын реттей алатыны және аталған тетікті жетілдіретін жаңа нормалар әзірленіп жатқаны айтылған.

— Заң бойынша мемлекеттік бюджеттен және Мемлекеттік әлеуметтік сақтандыру қорынан төленетін жәрдемақылар мен әлеуметтік төлемдерді аударуға арналған банк шоттарындағы ақшаны үшінші тұлғалардың өндіріп алуынан мемлекет қорғайды. Зейнетақы аталған төлем түрлеріне жатқызылмаған. Әлеуметтік Кодекстің 203-бабына сәйкес зейнетақыдан ұстап қалу атқарушылық іс жүргізу тәртібімен жүргізілуі мүмкін. Бірақ зейнетақыдан ұстап қалу төлемі 50 пайыздан аспау керек, — деп түсіндіреді Ермек Көшербаев.

Депутаттардың ұсынысын Ұлттық банктегілер де қолдамаса керек.

— Ұлттық банктің ұстанымы бойынша, егер зейнетақы төлемдерін үшінші тұлғалардың өндіріп алуынан толық қорғау енгізілсе, онда зейнеткерлерге берілетін несиелердің қайтарылуын қамтамасыз етуі қиынға соғуы ықтимал. Осылайша банктер өз кезегінде аталған санаттағы азаматтарға несие беруді қатаңдатуы немесе оны тоқтатуды қарастыруы мүмкін. Бұл осы банк өнімін пайдаланатын зейнеткерлер арасында келіспеушілік туғызады. Жекелеген санаттағы азаматтардың қарызын кешіру барлық қарыз алушылардың, оның ішінде төлеу қабілеті бар азаматтардың арасында масылдықтың өсуіне және кредиттік тәртібіне теріс әсер етіп, өз кезегінде қаржы нарығы үшін жүйелі тәуекелдердің пайда болуына әкеп соғуы мүмкін, — деп жазылған жауапта.

Бұған дейін Банк алдындағы борышы 2,1 млрд теңгеге жеткен астаналық тұрғын банкроттық рәсімдей алмай жүргенін жазған едік.