"Павлодар облысында тағы бiр мыс байыту зауыты ашылды", деп жазады "Егемен Қазақстан" газетi.
"Екібастұзда аяқ басқан жерің тас-көмір, кенге толы. Айналасы өндіріске толы Әлкей Марғұлан ауылы, «Аяқ Қожан» кен орны... «Fonet Er-Tai AK Mining» ЖШС-іне қарасты тағы да бір кен байыту фабрикасы ашылды. Өндіріс жылына 500 мың тонна кен мен 26 мың тонна мыс флотоконцентратын шығарады", - делiнген "26 мың тонна мыс!" атты мақалада.
Кәсіпорын еліміздің Үдемелі индустриялық-инновациялық даму бағдарламасының Индустрияландыру картасына енген. Жалпы, индустрияландыру бағдарламасы аясында бұл күндері өңірде құны 1 триллион теңге тұратын 85 жоба іске асырылуда.
***
"Айқын" басылымының бүгiнгi санында тарих ғылымдарының докторы, профессор Талас Омарбековтiң "Тарихтың түп қазығы Қазақ хандығы болуы тиiс" атты тақырыппен сұхбаты жарияланды. Қазақстан мемлекеттiлiгiнiң 550 жылдығы, тарих турасында өрбiген әңгiме жаңа деректермен астасып жатыр.
"Біз қазір Батыс түрік қағанаты деп атап жүргеніміз, шын мәнінде он оқ елі болатын. Былайша айтқанда, 10 тайпадан құралған мемлекеттік жүйе. Бұл бір кезде түркештер, тағы бір тұста қарлұқтар деп те аталды. Мәселен Шыңғысханға қатты қарсылық көрсетіп ұзақ соғысқан найман мемлекеті «найман хандығы», керей мемлекеті «керей хандығы» аталды. Осы күнге дейін осы жағын нақты айтпай келе жатырмыз. Айтуымыз керек. Біздің мемлекеттік жүйеміздің, біздің көшпелі қоғамның, көшпелі мемлекеттік саяси қоғамдық құрылымның ерекшелігі осында. Қысқасы, мемлекеттік жүйе белгілі бір тайпалардың басшылығымен қалыптасқан. Еліміздің айналамыздағы көршілерге қарағанда өзіндік басқаруы, өзіндік даму жолы болды. Жалпы айтқанда, қазақ хандығы - қазақ мемлекетінің шыққан шыңы, жоғарғы биігі. Қазақ хандығы өміршеңдігін көрсетті, мықтылығын танытты. Кешегі Кенесары бастаған қазақ хандығының Ресей секілді отырықшы елге қарсы тұра алуы, Абылайхан секілді тұлға басқарған елдің Қытайдай алып елмен алысып, өзімен санастыра білуі жай шаруа емес. Қазақ хандығының мықтылығы, жұмылған жұдырықтай күштілігі", - дейдi Омарбеков.
Қазақстан футбол федерациясын 7 жыл басқарған Әділбек Жақсыбеков өз еркімен отставкаға кететінін мәлімдеді. Жақсыбеков тізгіндеген 7 жылда ел футболында не өзгерді? Алға басқан қадамымыз қанша, артқа кеткені ше? Осы сауалдарға "Айқын" жауап iздеп көрген. Автор Қазақстан құрамасының бұрынғы және бүгiнгi шама-шарқына, жетiстiктерi мен тоқырау көрген тұстарына, легионерлер мен бапкерлер тақырыбына, инфрақұрылым мен биiк мақсаттар және 2026 жылы әлем чемпионатын Қазақстанда өткiзу туралы мәселелерге егжей-тегжейлi тоқталған. Толығырақ "Жақсыбеков қазақ футболына не бердi?!" атты мақаладан оқи аласыздар.
***
Солтүстiк көршiлерiмiзге арзан көлiк сатып алуға ағылған қазақтарды Ресей рэкетирлерi бопсалауға кiрiстi, деп жазады "Экспресс К" газетi. "Лихие из 90-х" атты мақалада атап көрсетiлгенiндей, бандиттер "алым-салықты" ақшамен немесе темiр тұлпармен алады. Келiспегендердi соққыға жығып, "көк-ала қойдай" сабап кетiп отырады.
"Шекараға жақын қалаларда рэкетирлер белең алған. Олар тиiмдi бағамен көлiк сатып алуға келген қазақстандықтарды тонаумен айналысып жүр", - деп жазады басылым.