«Ақпараттық кеңістіктің мониторингін Ақпарат жəне қоғамдық даму министрлігі жүзеге асыратынына жəне жарияланымдарда қылмыстық құқықбұзушылықтар құрамының белгілері анықталған жағдайда оларды тергеу үшін Ішкі істер министрлігіне жіберетінін атап өтеміз. Осы жылдың 9 айында көрсетілген фактілер бойынша ішкі істер органдары ҚК-нің 274-бабымен сотқа дейінгі 100 тергеп-тексеруді тіркеген», - деді ҚР Бас прокуроры.
Оның дерегінше, 7 іс сотқа жіберіліп, 46 іс (қылмыстық құқық бұзушылық құрамының болмауына байланысты) тоқтатылды. 28 қылмыстық іс бойынша сотқа дейінгі тергеп-тексеру мерзімдері үзілген (қылмыстық құқық бұзушылық жасаған адам анықталмаған - 20 іс, күдікті, айыпталушы Қазақстан Республикасынан тысқары жерде болуына орай - 2 іс, сараптамаға байланысты - 6 іс), 19 іс тергелуде.
«Осындай құқықбұзушылықтардың алдын алу аясында Бас прокуратура «Прокуратура туралы» Заңның 31-бабы тəртібінде осы жылы БАҚ-та екі рет үндеу жасады. Оонда ұлттық алауыздықты қоздыруға, сепаратизмді насихаттауға жəне жалған хабарламаларды таратуға бағытталған құқықбұзушылықтар үшін заңда белгіленген жауапкершілік туралы ескертілді»,- деді Берік Асылов.