Отаға Жамбыл облыстық көпбейінді балалар ауруханасының мамандары қатысты. Дәрігерлер тексеру барысында баланың асқазанында безоар – ағза қалыпты түрде қорыта алмайтын заттардың тығыз шоғырлануы пайда болғанын анықтады.
Мұндай түзілістер балаларда салыстырмалы түрде сирек кездеседі. Оның пайда болуына өсімдік талшықтары, тұқымдар мен азық-түлік қабықтары, сондай-ақ жұтылып кеткен шаш, жіп және басқа да бөгде заттар себеп болуы мүмкін.
Бұл кішкентай науқаста түзілістің көлемі айтарлықтай болған. Оның ұзындығы шамамен 10–12 сантиметрге, ал ені 7–9 сантиметрге жеткен.
Уақытылы жүргізілген диагностика асқынулар пайда болғанға дейін балаға қажетті медициналық көмек көрсетуге мүмкіндік берді. Безоар хирургиялық жолмен толығымен алынды.
Отадан кейін науқас мамандардың бақылауында болды. Оның жағдайы тез тұрақтанды. Қазір емдеу курсы аяқталып, бала өзін жақсы сезінеді және үйіне шығарылды.
Дәрігерлер кішкентай балалардың жеуге жарамсыз заттарды байқамай жұтып қоюы мүмкін екенін ескертеді. Ата-аналарға баланың денсаулығындағы өзгерістерге назар аудару ұсынылады. Іштің ауыруы, тәбеттің төмендеуі, жүрек айнуы немесе құсу байқалса, медициналық көмекке жүгінген жөн.
Еске сала кетейік, бұған дейін Алматыда баланың ішегінен 59 магнит алынған еді.
Сондай-ақ Алматыда бала абайсызда жұтып қойған үш магнит асқазан мен ішекті жалғап жібергенін жаздық.