Жамбыл облысының Полиция департаменті қаңтар оқиғасы кезінде ұрланған, заңсыз сақталған қаруды іздеу және тәркілеу жұмыстарын жалғастырып келеді. Осы мақсатта сәуір айының соңына қарай облыста «Қару» жедел-алдын алу іс-шарасы өткен болатын.
Полиция қызметкерлері жедел-іздестіру шаралары кезінде Тараздағы «Солнечный» иінінен қару-жарақ пен оқ-дәрі салынған полипропилен пакетін тапқан. Онда Жамбыл облысы ПД қоймасынан ұрланған 5,45 мм калибрлі «АКС-74» автоматы, 12 мм калибрлі «ИЖ-54» маркалы екі ұңғылы аңшы мылтығы, 16 мм калибрлі «ИЖ-ЗК» маркалы бір ұңғылы аңшы мылтығы, «ИЖ-18ЕМ» 16 мм калибрлі тегіс ұңғылы аңшы мылтығы, 16 мм калибрлі «ИЖ-58» маркалы бір ұңғылы шолақ аңшы мылтығы болған.
Аталған дерекке қатысты ҚР Қылмыстық Кодексінің 287-бабы 3-бөлімінің «Қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру» бойынша сотқа дейінгі тергеу амалдары басталды.
«Іс-шараның 5 күнінде полицейлер заңсыз айналымнан 54 қару, 448 оқ-дәрі, 1 жарық-шу гранатасын, 9 арнайы құралды тәркіледі. Алынған барлық құралдарға сот-баллистикалық сараптамалар тағайындалды. Полиция қызметкерлері қару иелерінің тұрғылықты жері бойынша, сондай-ақ шалғайдағы 704 шаруа қожалығына тексеру жұмыстарын жүргізді.
Жедел-алдын алу шарасы барысында 21 адам әкімшілік жауапкершілікке тартылды, оның ішінде қаруды сақтау ережелерін бұзудың 15 дерегі, қаруды қайта тіркеуді бұзудың 6 фактісі анықталды. Осылайша, сәуір айында заңсыз айналымнан 60 қару мен 1 183 оқ тәркіленді», - деді Жамбыл облысы ПД бастығының орынбасары, полиция полковнигі Нұржан Рахметуллаев.
Бұған дейін Таразда қараусыз ғимараттан қару-жарақ пен оқ-дәрілер табылғанын жазған болатынбыз.