Жамбыл облысында үш шекара бекетінің салтанатты ашылу рәсімі өтті
13:10, 23 Желтоқсан 2013
АСТАНА. 23 желтоқсан. ҚазАқпарат - Бүгін Жамбыл облысында қазақстан-қырғыз мемлекеттік шекара шебінде ҚР ҰҚК Шекара қызметі «Оңтүстік» Өңірлік басқармасы Қордай шекара отрядында «Сортөбе», «Өтеген» және «Қасық» үш шекара бекетінің салтанатты ашылу рәсімі болды. Бұл туралы ҚР ҰҚК баспасөз қызметінен хабарлады.
ҰҚК Төрағасы Нұртай Әбіқаев «Сортөбе» бекетін аша отырып, бөлімше бастығына рәміздік кілтін тапсырып, мемлекеттік шекараны жайластыру ауқымды мемлекеттік бағдарламасын жүзеге асыруда кезекті қадам жасалғандығын, тек 2013 жылы жаңа талаптарға сай 20 шекара бекетінің іске қосылғандығын атап өтті.
Комитет басшысының қолынан жаңа бекет шекарашылары пәтер кілттерін алды. ҚР Парламенті Сенаты депутаттары, Жамбыл облысының әкімі және басқа да шақырылған қонақтар шекара қалашығының инфрақұрылымымен, сондай-ақ автокөлік және арнайы техникасымен танысты.
Депутаттар Қазақстан шекарашыларының халық пен елдің мүддесіне риясыз қызмет ететіндігіне, әскери антқа және қызметтік парызға адал болатындығына сенім білдірді.