Жамбыл облысындағы «Оңтүстік» өңірлік қолбасшылығында қаза тапқан әскерилермен қоштасты
Жамбыл облысы әкімдігінің баспасөз қызметі хабарлағандай, қаза тапқан әскерилердің мәйіті туыстарына жеткізіледі. Жерлеу рәсімінің уақытын отбасылардың өздері шешеді.
Қаза тапқандардың төртеуі Жамбыл облысында тұратындығы белгілі. 24 жастағы келісімшарт қызметіндегі қатардағы жауынгер Тілеужан Кеңесов, 22 жастағы қатардағы жауынгер Мақсат Шәкен, 26 жастағы ефрейтор Мұхит Тұрысмағанбетов - Жуалы ауданының, 25 жасар кіші сержант Әуесбай Ерісбаев - Тараз қаласының тумасы.
Алматылық аға лейтенант Әлішер Мошабаев пен кіші сержант Мақсат Қыдырбаев небәрі 26 жастарында көз жұмды. 29 жастағы кіші сержант Әмір Аралбаев ОҚО тұрғыны болған.
Бұрын хабарланғандай, Жамбыл облысындағы Көксай шатқалында өтіп жатқан 91678 әскери бөлімі әскери қызметшілерінің жауынгерлік дайындығы бойынша жоспарлы сабағы барысында күтпеген жерден қар көшкіні орын алды. ҚР Қорғаныс министрі Сәкен Жасұзақов бастаған Үкімет комиссиясы жұма күні қар көшкіні салдарынан әскери қызметшілер қаза тапқан Жамбыл облысына келді. Комиссия мүшелері оқиға орнында төтенше жағдайдың себебін анықтап, қаза тапқандардың отбасына көмек көрсету жұмыстарын ұйымдастырумен айналысады. Қаза тапқан әскерилердің отбасыларына өтемақы беріледі. Әскери қызмет және әскери қызметшілердің мәртебесі туралы» Қазақстан Республикасы Заңының 51 бабына сәйкес әскери қызметтік міндеттерін орындау кезінде қаза болған (қайтыс болған) жағдайда соңғы қайтыс болар (қаза болар) күні атқарған лауазымына сәйкес 5 жылдық ақшалай үлес көлемінде бір реттік өтемақы төлеу қарастырылған.
Бұл мәселе ҚР Премьер-Министрі Бақытжан Сағынтаевтың жеке бақылауында .