Жамбыл облысының әкімі табиғи апаттан зардап шеккен қалаларды қалпына келтіру барысымен танысты
САрысу ауданы бойынша ТЖ штабы жиналысында мәлім етілгендей, Жаңатаста қазір 102 нысанда жұмыстар жүргізілуде. Соның ішінде 54-інде ағымдық жөндеу, 48-інде - күрделі жөндеу жұмыстары жүргізілуде. Зардап шеккен нысандардың шатырларын қалпына келтіру бойынша құрылыс-монтаждау жұмыстары жүргізіліп жатыр. Бүгінгі таңда ауданда 35 отбасы өз қаражатына баспаналарының шатарын жөндей алмай отыр, сегіз отбасы демеушілер қаражатына жөндеу жүргізуде. Аймаққа бөлінген құрылыс материалдарының 15 пайызы жергілікті тұрғындарға үлестіріліп берілді.
Аудандағы бес балабақшаға балаларды қабылдау қалпына келтіру жұмыстары аяқталғанға дейін тоқтатылды.
«ЖЭС» ЖШС мәліметтерінше, Жаңатас қаласының жүз пайыз абоненттеріне электр энергиясы берілді, Сарысу ауданының басқа елді мекендерінде электрмен қамтамасыз етуді қалпына келтіру жұмыстары жалғасуда.
Талас ауданының Қаратау қаласында орталық қазандықта жеті монтаждау мекемелері қалпына келтіру жұмыстарын жүргізуде, үш қазандық жұмыс жасап тұр, жаңа 15 метрлік түтін шығатын құбыр орнатылды. Берілу кезіндегі температура 72°С, кері - 57°С.
«ЖЭС» ЖШС мәліметтерінше, аудан абоненттерінің 86,2 пайызына электр энергиясы берілді.
Аймақ басшысы алдағы күндері қажетті жобалық-сметалық құжаттаманы әзірлеп, жергілікті атқарушы органдарға бұған көмек көрсетуді тапсырды.
Облыс әкімі сондай-ақ халыққа құрылыс материалдарын тарату кезіндегі ашытықты бақылау үшін ТЖ салдарынан келген шығынды бағалау комиссиясының құрамына «Нұр Отан» ХДП, ҮЕҰ өкілдерін, аудандық мәслихат депутаттарын, қоғам мен БАҚ өкілдерін қосуды тапсырды. Қ.Бозымбаев бір апта ішінде Жаңатас және Қаратау қалаларындағы қалпына келтіру жұмыстарын аяқтауды жүктеді.
Облыс бойынша жөндеу-қалпына келтіру жұмыстарына 90-нан астам құрылыс мекемесі, 150-ге тарта арнайы техника мен 2300-ден аса жұмысшы жұмылдырылған.
Жаңатас және Қаратау қалаларында 287 нысанды қалпына келтіруде, соның ішінде 176 көппәтерлі тұрғын үй, 88 әлеуметтік мекеме, 21 әкімшілік ғимарат пен екі орталық жылу қазандығы бар.
Бүгінгі таңда зардап шеккен 359 нысаннның 70-інде жөндеу жұмыстары аяқталды. Жөндеу-қалпына келтіру жұмыстары күнделікті бақылауға алынды, деп хабарлайды Жамбыл облысы әкімінің баспасөз қызметінен.