Жаңа өнімді қабылдауға элеваторларды дайындау жұмыстары жүргізіліп жатыр

АСТАНА. KAZINFORM – Жаппай орақ науқаны қарсаңында өңірлерде 2025 жылғы өнімді қабылдауға арналған элеватор сыйымдылықтарын босату жұмыстары жүргізіліп жатыр, деп хабарлайды Ауыл шаруашылығы министрлігінің баспасөз қызметі.

Іс-шаралар жиналған астықтың сақталуына және оны үздіксіз сақтау процесін қамтамасыз етуге бағытталған.

Облыс әкімдіктерінің мәліметінше, астық сақтау сыйымдылығының жалпы көлемі 30,9 млн тоннаны құрайды. Оның ішінде 13,5 млн тоннасы — жұмыс істеп тұрған лицензияланған астық қабылдау кәсіпорындарында, 17,4 млн тоннасы — ауыл шаруашылығы тауарын өндірушілерде.

Qoldau.kz ақпараттық жүйесінің деректеріне сәйкес, лицензияланған астық қоймаларының жүктемесі 2,3 млн тоннаға (17%) жетеді, ал бос көлемі шамамен 11 млн тонна. Бұл сыйымдылықтар өткен жылдардағы ауыспалы қалдықтарды ескере отырып, жаңа өнімді қабылдауға жеткілікті.

Ауыл шаруашылығы министрлігі элеваторларды босату барысын мониторингтеуді жалғастыруда.

Айта кетейік, астық пен ұн экспорты 12,4 млн тоннаға жетті.