ОРАЛ. 28 желтоқсан. ҚазАқпарат - Бүгін Орал қаласындағы Жастар мәдениет үйінде БҚО ішкі істер органдары қызметкерлерінің отбасылары мен олардың балаларына арналған жаңажылдық шырша ұйымдастырылды.
Облыстық ІІД баспасөз қызметінен түскен мәліметке қарағанда, бүлдіршіндерге Жастар мәдениет үйінің өнерпаздары мерекелік бағдарламасын ұсынды. Жаңажылдық қойылымда ертегі кейіпкерлері - Маша мен Аю, Жалмауыз кемпір, сондай-ақ келе жатқан Жылқы жылының символы бүлдіршіндермен бірге түрлі ойындар ойнап, сайқымазақтар би биледі. Балалар шыршаны айнала ән айтып, би билеп, Аяз ата мен Ақшақарға өз өнерлерін көрсетті. Жасыл шырша маңына жиналған балалардың қуанышында шек болмады. Мерекеге арнайы дайындалған сахналық көріністер балдырғандар көңілін асқақтатты.
Мереке соңында Аяз Ата мен Ақшақар бүлдіршіндерге арнап дайындаған сыйлықтарын таратып, балаларға қызықты жаңажылдық мультфильм көрсетілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).