АСТАНА. KAZINFORM – Англиялық Шакил Томпсонның менеджері боксшының қазақстандық Жәнібек Әлімханұлы командасымен келіссөзі жайында айтып берді.
Бірқатар дереккөзде орта салмақта әлем чемпионы атанған Жәнібек Әлімханұлы (16-0, 11 КО) мен әзірге жеңіліп көрмеген британдық спортшының жекпе-жегі сәуір немесе мамыр айларында Қазақстанда өтуі мүмкін екені хабарланған еді.
Агент Кевин Мари Ring Magazine сайтына берген сұхбатында оған байланысты келіссөз шын мәнінде жүріп жатқанын айтты.
27-жастағы Шакил Томпсон өзінің мансабында 13 жекпе-жек өткізді. Оның ішінде барлығында қарсыласын қапы қалдырып, 9-ында нокаутпен жеңген.
WBO рейтингінде британиялық боксшы 9-орынға жайғасқан. Бұл титул үшін жекпе-жек өткізуге мүмкіндік береді.
Еске салсақ, Жәнібек Әлімханұлының соңғы жекпе-жегі Аустралияда 4 қазан күні болды. Бұл жолы ол Жаңа Зеландия өкілі Андрей Михайловичті тоғызыншы раундта техникалық нокаутпен тізе бүктірді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.