Қазақстан ұлттық құрамасының мүшесі Жанбота Алдабергенова Финляндияның Рука қаласында фристайл-акробатика мен могулдан өткен әлем кубогінің алғашқы кезеңінде үздік үштіктен көрінді, деп хабарлайды Kazinform.
Спортты дамыту дирекциясының баспасөз қызметінен мәлім еткеніндей, акробатикадан өнер көрсеткен Жанбота финалда 77.43 балл жинап, қола жүлдегер атанды.
Алтынды Бейжің олимпиадасының (аралас командалық сын) қола жүлдегері Марион Тено (Канада) жеңіп алса, күміс аустралиялық Даниэль Скоттың еншісінде кетті. Д.Скот бұған дейін әлем чемпионатында 2 мәрте күміске ие болған.
Бір қызығы, қазақ спортшысы тура бір жыл бұрын осында өткен 2022-2023 жылғы маусымдағы әлем кубогінің беташар кезеңінде де қола алған еді. Ол кезде Ж.Алдабергеноваға 80,04 ұпай жеткілікті болған. Жалпы, Рука қаласы биыл FIS-тің фристайл маусымын қатарынан 14-рет бастап берді.
Фристайл-могулда ұлттық құрама спортшыларынан ең жоғарғы сатыға Павел Колмаков тұрақтады. Ол жекелей сында бесінші орынға табан тіреді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).