Жапондық комикстер 5 жыл қатарынан сатылым бойынша рекорд жаңартып келеді

АСТАНА. KAZINFORM — Жапонияда комикс (Манга) сатылымы 2024 жылы алғаш рет 700 млрд иеннен (4 4,67 млрд доллар) асты, деп хабарлайды Kazinform Kyodo News-ке сілтеме жасап.  

Манга комикстерінің сатылымы өткен жылмен салыстырғанда 1,5%-ға өсті.

Осылайша, бесінші жыл қатарынан Манга сатылымының рекордтық көрсеткіштері тіркеліп отыр. Бұл ретте жалпы сомасы 704,3 миллиард иенге жуықтаған комикстің 72,7%-ы цифрлық форматта сатылғанын айта кеткен жөн.

Комикстің баспадағы нұсқаларының сатылымы COVID-19 пандемиясы кезінде сұраныстың азаюынан кейін әлі де төмендеп келеді, деп хабарлайды Жарияланымдарды зерттеу институты (Research Institute for Publications).

Манга комикстерінің цифрлық сатылымы 6%-ға өсіп, 512,2 миллиард иенге жетті. Дегенмен институттың мәліметі бойынша өсу қарқыны баяулайды.

Баспадағы нұсқаларының сатылымы өткен жылмен салыстырғанда 8,8%-ға төмендеп, 192,1 миллиард иенді құрады.

Бұл көрсеткіштер өткен жылы Сиқырлы шайқас (Jujutsu Kaisen), Менің қаһарман академиям (My Hero Academia) және Жұлдызды бала (Oshi no Ko) сынды бірнеше танымал сериялардың аяқталуымен сәйкес келді.

Жапонияның баспа нарығындағы Манга комикстерінің үлесі 1,3%-ға өсіп, 44,8%-ға жетті, деп хабарлайды жапониялық ақпарат агенттігі.

Бұдан бұрын Жапония атом энергетикасы саласын қайта қарастыратыны айтылды.