Күннің екінші жартысында ел Парламентінің сессиясында Жапония Премьер-министрі сайланады.
Елдің Премьер-министрі Парламент депутаттарының ішінен сайланып, елу пайыздан астам дауыс жиюы тиіс. Әр партия кандидат ретінде өз лидерін ұсынады. Жапонияда 14 желтоқсанда өткен Парламенттің төменгі палатасы сайлауының қорытындысы бойынша, Либералды-демократиялық партия мен Комэйто партиясының басқарушы коалициясы депутаттық орынның үштен екі бөлігінен астамына - 475 орынның 326-сына ие болған. Осылайша, Премьер-министр Синдзо Абэ өз лауазымын сақтап, Үкіметті құру құқығына ие болуы тиіс. Сайлаудағы жеңісінен кейін премьер үкіметтің қазіргі құрамын өзгеріссіз қалдырып, бар күшті экономика мәселелерін шешуге бағыттайтынын айтты. Тек қорғаныс министрі ауысуы мүмкін. Бұл орынға Акинори Этоның орнына Гэн Накатани тағайындалады деп күтілуде. Кешке кабинет мүшелері мен премьер-министр Жапония императоры Акихитоның үкіметті бекіту салтанатты шарасына қатысады.