Жасыл жайлау, түкті кілем, көк кілем - «Атамекен» әніне 55 жыл
АЛМАТЫ. KAZINFORM – Қазақстанның халық әртісі Ескендір Хасанғалиевтің туғанына бүгін 85, ал «Атамекен» әніне биыл 55 жыл толды.
Дарынды тұлғаның ұлы Біржан Хасанғалиев агенттік тілшісімен сұхбат барысында әннің шығу тарихы туралы айтып берді.
– «Атамекен» әні 1970 жылы шыққан. Бастапқыда туған өлкеге деген сағыныштан әуен туады. Ұзақ толғаныстардан кейін, әуенге сөз жазылады. Дайын болған соң, Ескендір Хасанғалиев оны Қадыр Мырза Әліге тыңдатады. Әуен ақынға бірден ұнап қалады. Ол әкеме: «Рухты оятып, жігер-күш беретін нағыз патриоттық ән екен. Оны бір ауылға немесе бір облысқа емес, бүкіл қазақ халқына арнау керек», - деп ұсыныс жасайды.
Ұлт руханиятында есімдері алтын әріппен жазылған Қадыр Мырза Әлі мен Ескендір Хасанғалиевтің шығармашылық одағынан туған туынды бірден халық сүйіспеншілігіне бөленеді.
Қазақ жерінде емес, шетелдерде де танылды. Жарты ғасырдан астам уақыт бұрын жазылған мағыналы ән бұл күнде өз рухын жоғалтқан жоқ. Кез келген қазақ концертінде шырқалады. Бірде-бір мемлекеттік деңгейдегі мерекелік салтанатты жиын «Атамекен» әнінсіз өтпейді. Бұл - қазақ жүрегінің жырына айналған ән, - деді ол.
Айта кетсек, 13 ақпан – ҚР Мемлекеттік сыйлығының иегері, Қазақстанның халық әртісі Ескендір Хасанғалиевтің туған күні.