Бұл туралы бүгін өткен баспасөз мәслихатында ҚР Білім және ғылым министрлігі Жастар саясаты және тәрбие жұмысы департаменті бастығының орынбасары Мәдияр Қожахмет мәлім етті, деп хабарлайды ҚазАқпарат.
Мерекелік іс-шара Петропавл қаласының М.Жұмабаев ауданында (бұрынғы Булаев ауданы) өтеді. «Оған Қазақстанның барлық өңірінен жастар еңбек жасақтарының ең үздік 200 сарбазы, аталмыш қозғалыстың ардагерлері және мемлекеттік органдардың өкілдері қатысатын болады. Сондай-ақ осы күндері айтулы датаға арнап ескерткіш қоюды жоспарлап отырмыз», - деді ол.
М.Қожахметтің айтуынша, 1959 жылы дәл осы Булаев кентіне тұңғыш рет М.Ломоносов атындағы Мәскеу мемлекеттік университетінің студенттік құрылыс жасағы (СҚЖ) аттандырылған және осы жерден СҚЖ-ның тарихы басталады. Булаев кентінде СҚЖ мен кеңшар басқармалары арасында алғашқы келісімдер жасала бастайды.