Жат ағымның жетегінде кеткен жастар туралы бірегей мәліметтік база құрылуы керек - С. Нұрқатова
«Ең алдымен бізге жат ағымдардың жетегінде кеткен, «қатер тобына» еніп кетуі ықтимал жастар туралы бірегей мәліметтер базасын құрғанымыз ләзім. Өйткені, біз өңірдегі оқу мекемелеріне сараптама жүргізгенде осындай қажеттілікке көз жетті. Ақтөбе оқу орындарында тек облыс жастары ғана емес, көршілес өңірлерден, басқа облыстардан да келіп білім алып жатқан студенттер баршылық. Олардың арасында діни тақырыптарда бір-бірімен әңгімелесу, сол арқылы араласушылықтар да баршылық», - дейді әкім орынбасары. Оның айтуынша, бұған интернет те өз септігін тигізбек. Соған орай, аталған діни ағымдарға қатысты мәселе тек Ақтөбе облысында ғана емес, бүкіл аймақтарда өзекті болып табылады.
Бұдан бөлек, әкім орынбасары оқу мекемелерінде киім киюдің бірегей талаптары бекітілуі тиістігін атап өтті. «Бұл өте нәзік тақырып. Дегенмен, кез келген оқу орындарында бірегей киім кию талабы тәртіпті қамтиды, идеологиялық сипаттағы жұмысты жақсартады», - дейді Сара Нұрқатова.