«Жайлы мектеп» ұлттық жобасы: Шымкентте 18 мектеп салынады

ШЫМКЕНТ. KAZINFORM – «Жайлы мектеп» Ұлттық жобасы аясында Шымкентте 28 мың оқушыға арналған 18 мектеп салу жоспарланған. Оның екеуі қолданысқа берілді, 10-ы салынып жатыр. Бұл туралы қала әкімі Ғабит Сыздықбеков айтты.

«Қазір қалада 13 елді мекенде мектеп жоқ және 21 мектепте орын тапшылығы бар. Президентіміздің бастамасымен жүзеге асырылып жатқан «Жайлы мектеп» Ұлттық жобасы аясында қалада 28 мың оқушыға арналған 18 мектеп салу жоспарланған. Оның ішінде 3200 орындық 2 мектеп пайдалануға тапсырылып, 10 мектептің құрылысы жүргізілуде. Сонымен қатар, «Білім беру инфрақұрылымын қолдау қорынан» 3 мектептің құрылысына 7,9 млрд теңге қаралды. Одан бөлек, инвесторлардың жеке қаражаты есебінен 2 800 орындық 5 мектеп пайдалануға берілді», - деді қала әкімі ОКҚ алаңында.

Ғабит Сыздықбековтің айтуынша, Президентіміздің тапсырмасына сәйкес, Тұран шағын ауданында 500 орындық Оқушылар сарайының құрылысы 80 пайызға орындалған. Биыл 4 мектеп, 1 колледжге күрделі жөндеу жұмыстары жүргізілуде, аталған нысандар жыл соңында іске қосылады.

Сондай-ақ, мегаполис басшысы жастардың жоғарғы оқу орындарында сапалы білім алуына жағдай жасау мақсатында жергілікті бюджеттен 285 грант бөлінгенін айтты.

Айта кетейік, бұған дейін қала басшысы Шымкентте өңдеу өнеркәсібі саласында 12 жоба іске қосылып, 1000-нан астам жаңа жұмыс орны ашылғанын айтқан болатын.

Сондай-ақ, қалада жаңадан 2 индустриялық аймақ іске қосылғаны айтылды.

Одан бөлек, Шымкентте еліміздегі ең үлкен жылыжай салынатын болды.