ОРАЛ. 10 сәуір. ҚазАқпарат - Батыс Қазақстан облысында Жайық өзенінде ғана су көтеріліп барады. Қалған өзендерде судың беті қайтты.
Облыстық төтенше жағдайлар департаментінің баспасөз қызметінен 10 сәуір күні түскен мәліметке қарағанда, Ириклин су қоймасынан секундына 20, Варфоломеевтен 12,5 текше метр су жіберілуде.
Облыстық маңызы бар Бөрлі-Ақсай-Жымпиты жолында Ақбұлақ ауылы тұсында (10-шақырымда) жолға су шыққанымен, қозғалыс бар. Үлкен Шаған-Вечный жолының 78-шақырымында су өткізетін тұрбаның тұсында топырақты су шайып кеткен. Көктемгі лайсаңға байланысты Зеленов ауданының Астафьев, Карпов, Таловая елді мекендерімен көлік қатынасы үзілген.
Республикалық маңызы бар жолдарда су шайған жерлер жоқ.
Облыс аудандарында су тасқынынан келер қауіп сейілді.
Тасқынның алдын алу жұмыстарына ТЖМ бөлімшелерінен 207 адам, 47 техника, 40 жүзу құралы, жергілікті атқарушы органдардан 653 адам, 161 техника қатыстырылуда.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).