ОРАЛ. 20 ақпан. ҚазАқпарат - Шаған мен Деркөлді айтпағанда, биыл Жайық өзенінде су деңгейінің көтерілуі ықтимал.
Облыс әкімі Нұрлан Ноғаевтың сөзіне қарағанда, мұның себебі - Орынбор облысында қар көп. Сонымен қатар Ирикла су қоймасында су қоры мол.
«Су тасқынына дайындық мәселесі барлық деңгейдегі әкімдердің, басқармалар мен департаменттер басшыларының тұрақты бақылауын қажет етеді. Қазіргі таңда ұйымдастыру, материалдық және техникалық ресурстармен қамтамасыз ету мәселелері шешілді. Облыстағы хабарландыру жүйесі дайын деуге болады. Барлық қолда бар күштер мен құралдар әзір. Су тасқынына дайындық жұмыстары тек мемлекеттік органдардың ғана міндеті емес, бұл шараларға облыстың әрбір тұрғыны, соның ішінде жеке сектор мен саяжайдың тұрғындары да қатысулары қажет. Қазірден бастап аулалардағы қарды шығарып, үйлердің маңындағы арықтар тазартылуы тиіс», деген әкім су тасқынының алдын алуға бағытталған іс-шараларды толық орындауды тапсырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).