АСТАНА. KAZINFORM — Қазақстандық теннисші Жібек Құламбаева жұптық сында Врнячка-Баня (Сербия) ITF W35 турнирінің жартылай финалына шықты.
Жарыстың 1-ракеткалары болып тіркелген Ж.Құламбаева – словениялық Жива Фалкнер доданы бірден ширек финалдан бастады.
Қазақстандық-словениялық жұп испаниялық Ана Гиралди Регуена – ирандық Мешкатолзахра Сафиды 7:5, 6:4 есебімен тізе бүктірді. Ойын сағат жарымға жуық уақытқа созылды.
Ж.Құламбаева – Ж.Фалкнердің жартылай финалдағы қарсыластары кейін белгілі болады.
Жібек осы додада жекелей сында сәтті өнер көрсете алған жоқ. Ол алғашқы айналымда-ақ дүниежүзілік рейтингіде 412-орында тұрған франциялық Сара Цакаревичке жол берді – 4:6, 4:6.
Бір апта бұрын Куршумлия-Баняда Құламбаева дәл осы теннисшіні 6:1, 6:3 есебімен ұтып, ширек финалға шыққан еді.
Сол турнирдегі табысы нәтижесінде Ж.Құламбаева WTA рейтингісінде 427-ден 371-орынға көтерілген болатын.
Еске сала кетейік, бұдан бұрын US Open турнирінде Тимофей Скатовтың іріктеу сайысының финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).