Жел екпіні 23 м/с дейін жетеді: ТЖД астаналықтарға үндеу жасады

АСТАНА. KAZINFORM — «Қазгидромет» РМК деректері бойынша 12 желтоқсанда Астанада оңтүстік-батыстан 15-20 м/с жел соғады, түнде және таңертең желдің екпіні 23 м/с дейін жетеді деп күтілуде, деп хабарлайды елорда әкімдігінің ресми сайты.

Ауа райының нашарлауына байланысты қатты жел кезінде жазатайым оқиғаларды болдырмау үшін Астана ТЖД мынадай қауіпсіздік шараларын сақтауды сұрайды:

— жел күшейген кезде ғимараттардан шығуды шектеу керек (мүмкіндігінше үй-жайларда болыңыз);

— балаларды бақылауға алу және оларды қараусыз қалдырмау;

— егер қатты жел кезінде көшеде болсаңыз, жерасты өткелдерінде немесе дүкендерде паналауды ұсынамыз;

— қатты желден үйлердің қабырғаларына жақын жерде жасырынбаңыз, өйткені шатырлардан шифер мен басқа да материалдар құлауы мүмкін;

— ешбір жағдайда қоғамдық көлік аялдамаларының, билбордтардың, құрылысы аяқталмаған ғимараттардың, ағаштардың астында жасырынуға тырыспаңыз;

— электр желісінің астында тұрып, үзілген электр сымдарына жақындау өте қауіпті;

— көлікті шіріген және ескі ағаштардың жанына қалдырмаңыз.

Сонымен қатар, құтқарушылар қатты аязда өзін қалай ұстау керектігі туралы ұсыныстар берді:

— үнемі қозғалу керек, бір жерде тұруға болмайды, әсіресе қарға немесе суық заттарға отырмау керек. Бұл ретте металл мен бетон тіптен қауіпті;

— аяз кезінде аш жүрмеңіз, тамақ ішуге уақыт бөліңіз. Ыстық сусындар құйылған термос алып жүріңіз;

— жаман әдеттер туралы ұмытыңыз, алкогольді ішпеңіз;

— табаны қалың аяқ киімді таңдаңыз;

— аяқ-қолдар мен дененің ашық жерлерін жабыңыз;

— қалың киім киіп жүріңіз.

Төтенше жағдай туындаған кезде «101» және «112» нөмірлеріне қоңырау шалыңыз.

Еске салсақ, бұған дейін Астанада шолу дөңгелегінде коммуналдық қызметкерлердің суреттері жарияланды.