Жеңіс парадына қатысушылардың отбасылары әскерилерге тосынсый жасады
АСТАНА. KAZINFORM — Жақындарының далалық лагерьге келуі жауынгерлер үшін тосынсый болды, деп хабарлайды Қорғаныс министрлігінің баспасөз қызметі.
«Астана» өңірлік қолбасшылығына қарасты 31775 әскери бөлімі әскери қызметшілерінің ата-аналары, бауырлары, жұбайлары мен балалары елорда шетіндегі далалық лагерге барды.
Ұлы Отан соғысындағы Жеңістің 80 жылдығына арналған шеруге санаулы ғана күн қалды. Бұл соңғы жылдардағы ең ауқымды іс-шаралардың бірі. Оған төрт мыңнан астам әскери қызметші қатысады.
Парадта ең лайықты, күшті әрі төзімді деген жауынгерлер ғана салтанатты сап түземек. Жеңіс шеруі ұрпақтар сабақтастығының символына айналып отыр.
31775 әскери бөлімі мотоатқыштар батальоны командирінің орынбасары майор Дәулет Қаракесековтің зайыбы кездесуден алған әсерін жасыра алмады.
— Жұбайым үшін мұндай тарихи оқиғаға қатысудың маңызды екенін түсінемін. Әскери адамға әрдайым отбасының қолдауы қажет. Біз мүнда сол мақсатпен келіп отырмыз. Жолдың қашықтығы еш кедергі емес, — деді Айдана Қаракесекова.
Жақындарының далалық лагерьге келуі жауынгерлер үшін тосынсый болды. Дәл осындай сәттерде армияның тек әскери форма мен қатаң тәртіптен тұрмайтынын сезінесің.
Осыған дейін Шығыс Қазақстанда Жеңіс күніне орай 100-ге жуық шара ұйымдастырылатыны белгілі болды.