Жетісуға келген алтайлықтар Астананың 20 жылдығын тойлады

ТАЛДЫҚОРҒАН. ҚазАқпарат - Жетісулық славяндар Астананың 20 жылдығын тойлауды бастап кетті. Осыған орай Текелі қаласында «Славян мәдениеті мен жазуы» күндеріне арналған ауқымды форум ұйымдастырылды. «Астана - арман қала» деп аталған фестивальге Алтайдан қонақтар келіп, жетісулық ағайынмен рухани байланыс орнатты, деп хабарлайды ҚазАқпарат тілшісі.

Алтайдан Алатауға бет алған славян өкілінің бірі Сергей Мозговой. Ағашқа жан бітірген шебер бірнеше туындысын Текеліге арнайы алып келіп, көрмеге қойды. Барнауылдан келген қонақ 14 жасынан бастап ағаштан түйін түюге машықтанғанын айтады. Сөзінше, оның кей туындылары Ресей Президентінің жеке мұражайында сақталған.

«Алтай өлкесінен  Жетісуға 8 адам келдік. Текелі қаласына бірінші рет келіп тұрмыз. Астананың 20 жылдығына арналған Славян мәдениетінің форумына қатысқанымызға өте қуаныштымыз. Астана  жайнай берсін. Астанаға қарап, біз Қазақстанның дамуын көріп жатырмыз», -деді шебер Сергей Мозговой.

Жетісу жерінде «Славян мәдениеті мен жазуы» күндеріне арналған  форум жылда ұйымдастырылады. Дәстүрге арналған  шара биыл Текелі қаласында өтіп,  кеште  екі елдің славяндары жиналған қауымға өнерлерін паш етті.

 «Ұлтаралық, этносаралық достықты нығайту. Әр ұлттың өзінің мәдениетін, жазбасын, тарихын, салт-дәстүрін дәріптеу, соны ұрпақтан-ұрпаққа жалғастыру. Соның арқасында ұлттардың арасында қарым-қатынасты, достықты нығайту болып табылады», - деді Текелі қаласының әкімі Бахтияр Өнербаев.

Ресей славяндары Астананы жас қала ретінде танитындарын айтады. Алыстан болса бас қаласының қарыштап дамуына куәміз, - дейді Алтайдан келген қонақтар.