Жетісулық бойжеткен Үшкөл көлін сақтап қалуды қолға алды
Бойжеткеннің мақсатын жүзеге асыруға «Stаrtup «Bolashak» байқауының гранты мүмкіндік береді. Себебі ол осы байқаудың жеңімпазы атанып, жүлделі бірінші орынға ие болды. Екі жыл қатырынан ұйымдастырылып жатқан тың идеялар байқауына Назым Ақсу ауданындағы құрғап бара жатқан Үшкөлге жан бітіру жобасын ұсынған болатын. Үшкөлді сақтап қалудың әлеуметтік және экологиялық маңызы зор. Көп жылдан бері қараусыз және күтусіз қалған көлге жақын арада құрғап кету қаупі төніп тұр. Сондықтан Назым Мұсабекова көлде балық өсіріп, табыс тауып қана қоймай, оның екінші тынысын ашып, қоршаған ортаға пайдасын да тигізбек.
Жобаның тиімділігін бағалау үшін «Балық шаруашылығы Қазақ ғылыми-зерттеу институты» ЖШС мамандары шақыртылып, зерттеу жүргізілді. Нәтижесінде көл суы балық өндіруге жарамды екені расталды. Қазіргі таңда жас кәсіпкердің ұтып алған 12 млн теңге қаржының 9 млн теңгесі мақсатты игерілуде. Өзен арнасы тазартылып, көл суға толтырылды. Балық шабақтарының алғашқы легі жіберілді.
Алдағы уақытта балықшыларға арналған үй мен балық өңдеу цехын тұрғызуды жоспарлап отыр. Жалпы байқау туралы Назым «Даму» қорының КҚКО мамандарынан естіген. Қатысуға ниет білдіріп, мамандар тарапыннан толық кеңес алды. Республика бойынша 2 752 қатысушының ішінде топ жарды. Жоба ойдағыдай жүзеге асса жаңа жұмыс орындары ашылып, өңірде тағы бір туристік әрі өндірістік нысан пайда болмақ.