Жетісайдағы демалыс саябағы сатылымға шықты
ТҮРКІСТАН. KAZINFORM – Жетісай қаласындағы саябақ сенімгерлік басқаруға беріледі. Сауда саттық 24 желтоқсан күні сағат 10:00 басталады. Кепілдік жарна: 4 699 350,00 теңге. Қазіргі кезде электрондық сауда алаңында өтінім қабылдау жұмыстары жүріп жатыр. Конкурс жеңімпазы 8 гектардан астам жерді 15 жылға сенімгерлік басқаруға алады.
Жетісайдағы бассейні бар орталық саябақтың жалпы ауданы 17 гектарды құрайды. Аудан әкімдігінің мәліметінше, 2022-2023 жылдары аумақтың жартысы қайта қалпына келтірілген. Алайда саябақтың 8 гектардан астам жері өзгеріссіз қалып, кейіннен сатып алу құқығынсыз конкурсқа шығарылып отыр.
Ережеге сәйкес, конкурсқа жалғыз қатысушы түссе де өтті деп танылады. Ал, сенімгерлік басқаруға алушы тек 15 жыл ғана иелік етеді. Ал, кейіннен сатып алуға құқы жоқ.
Тендерлік конкурстың шарттарына тоқталсақ:
Конкурс жеңімпазы нысанды негізгі мақсаттарға сәйкес пайдалануға; Нысанды Қазақстан Республикасының барлық құрылыс, өрт қауіпсіздігі, санитарлық, экологиялық нормаларына келтіруге және объектінің сақталуын қамтамасыз етуге; Объектіні сенімгерлік басқарушының қаражаты есебінен қажетті инфрақұрылыммен қамтамасыз етуге;
Жетісай қаласының тұрғындарын тарта отырып, еңбекті қорғау жөніндегі нормаларды сақтай отырып, жаңа жұмыс орындарын құруға;
Коммуналдық қызметтер бойынша барлық міндеттемелерді орындауға; Объектінің сақталуын қамтамасыз етуге; Кейіннен сатып алу құқығынсыз сенімгерлік басқару мерзімі ішінде инвестициялар салуға және саябаққа қосымша балалар ойын алаңдарын орнатуға;
Нысанды кейінгі сатып алу құқығынсыз сенімгерлік басқаруға беру кезеңі ішінде туындайтын салықтық міндеттемелерді уақтылы орындау;
Сенімгерлік басқаруға берілген мерзім ішінде нысанға 300 000 000 теңге инвестиция құюға;
Жаңа аттракциондардың орналасу жобасының әзірленуін, келісуін, бекітілуін қамтамасыз ету және оған қажетті рұқсат беру құжаттарын алынуын қамтамасыз ету және келісім шартқа тұрған мерзімнен бастап 1 жыл ішінде жаңа аттракциондардың 50 % қосылуын қамтамасыз етуге міндетті.
Еске сала кетейік, Павлодар әуежайы жеке меншікке өтетінін жазған болатынбыз.