Жетісу облысында науқастарға тиесілі дәрі-дәрмек жылдар бойы қорапта жатқан

ТАЛДЫҚОРҒАН. KAZINFORM — Апатты ғимаратта шашылып жатқан препараттар мен медициналық аппараттар Текелі қаласындағы ауруханаға тиесілі екен. Әлеуметтік желіге тараған бейнежазбадан ғимараттың қабырғалары опырылып тұрғанын, онда түрлі дәрі-дәрмектің шашылып жатқаны анық байқалады. Видео авторының сөзінше, онда жарамдылық мерзімі өтпеген дәрілер де бар.

Бейнежазбадан арнайы тізімге енген «Трамадол», құтыдағы ампициллин, коронавирус кезінде қолданатын арнайы жабдықтарды байқауға болады. Сондай-ақ, жарамдылық мерзімі өткен дәрі-дәрмектер де бар көрінеді. 

«Міне ампициллин препаратын көріп тұрмыз, жарамдылық мерзімі 2025 жылдың қараша айына дейін екен. Қараңыздаршы қаншама ампицилин жатыр. Осы дәрілерді сатып алу үшін адамдар жылдар бойы жұмыс істеп ақша табады. Ал мұнда ол ешкімге керек емес болып жатыр», — дейді видео авторы.

Ал Жетісу облыстық денсаулық сақтау басқармасы қызметтік тексеріс басталғанын хабарлады.

«Жетісу облысының Денсаулық сақтау басқармасы «Текелі қалалық ауруханасының ШЖҚ МКК» әкімшілігінің дәрілік заттар мен медициналық мақсаттағы бұйымдарды тиісінше сақтамағаны туралы осы жарияланымға қатысты қызметтік тергеудің басталғаны туралы хабарлайды. Пандемия кезінде (Covid19) дәрі-дәрмектер мен медициналық мақсаттағы бұйымдардың негізгі бөлігі қолданылды. Қызметтік тергеу аяқталғаннан кейін толық ақпарат берілетін болады», — дейді Жетісу облыстық денсаулық сақтау басқармасының баспасөз қызметі.

Еске салайық бұған дейін Талдықорғанда тұңғыш рет жіті лейкоз қатерлі ісігіне шалдыққан науқастың жазылып шыққанын жазғанбыз.