ПЕТРОПАВЛ. KAZINFORM – Петропавл қаласында волейболдан әйелдердің ұлттық лига командалары арасында Қазақстан чемпионатының ойындары өтуде.
Жексенбі күні алғашқы болып алаңға «Алматы» мен ұлттық лигаға өткен жылы ғана қосылған Оралдың «Грация KZ» командасы шықты.
Бірінші партияда алматылықтар 25:17 есебімен басым түссе, екіншісінде оралдықтар есе қайырды – 27:25. Дегенмен тәжірибесі мол алматылықтар өз мүмкіндігін жіберген жоқ – 26:24, 25:12. Қорытынды есеп – 3:1.
Көш басындағы командалардың бірі «Жетісу» (Талдықорған) 2024-2025 жылғы маусымды сәтті бастаған «Қарағандыны» 3:0 (25:21, 25:19, 25:17) есебімен тізе бүктірді.
Осылайша, сербиялық маман Марко Гршичтің шәкірттері ұпай санын 41-ге жеткізіп, турнир кестесіндегі жағдайын нығайта түсті.
Еске сала кетейік, бұдан бұрын Петропавлда волейболдан әйелдер арасында ұлттық лига командалары сынға түсетінін жазған болатынбыз.
Сондай-ақ Оралда волейболдан қыздар арасында Қазақстан қысқы чемпионаты аяқталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).