Жыл басынан павлодарлық монополистерге 20 млн теңгеден астам айыппұл салынған

ПАВЛОДАР. KAZINFORM - Облыстық табиғи монополияларды реттеу департаменті жыл басынан монополист компанияларға жоспардан тыс жеті тексеру жүргізген. Нәтижесінде бес заңбұзушылық тіркелді.

Департамент кейбір тұтынушылардың әділдікке қол жеткізуіне көмектескен. Мәселен, «Павлодар-Водоканал» ЖШС жаңа тұтынушылардан техникалық қызмет көрсету және құбырларды жуу үшін заңсыз ақы талап еткен. Шын мәнінде, бұл жұмыстар бұған дейін орындалған екен.

– Кәсіпорынға заңбұзушылықтарды жою, тұтынушыларға заңсыз өндірілген сомаларды қайтару және сумен жабдықтауға толық қолжетімділікті қамтамасыз ету туралы ұйғарым жіберілді. Ол толық көлемде орындалды. Сонымен қатар, кәсіпорынға қатысты әкімшілік іс қозғалды. Заңбұзушылық нәтижесінде алынған кірістің он пайызы мөлшерінде айыппұл салынды. Ол да толығымен төленді. Жалпы жыл басынан бері өңір монополистеріне салынған айыппұлдардың жалпы сомасы 20 миллион теңгеден асты, - дейді өңірлік табиғи монополияларды реттеу департаментінің басшысы Нұрлан Нұрмұратов.

Еске сала кетейік, Павлодарда сатып алу тәртібін сақтамаған монополист айыппұл төледі.