ОРАЛ. ҚазАқпарат - Батыс Қазақстан облысында 5-25 қазан аралығында өткізілген «Браконьер» жедел алдын алу шарасы барысында табиғат қорғау заңдылығын бұзудың 248 дерегі анықталды.
БҚО ІІД баспасөз қызметінен түскен мәліметке қарағанда, соның 138-і заңсыз аң аулау, 11-і заңсыз ағаш кесу, 43-і заңсыз су жануарларын аулау, 56-сы атыс қаруларын сатып алу, сақтау, пайдалану немесе тасымалдау ережесін бұзушылық ретінде тіркелді. Барлығы 857 575 теңге айыппұл салынып, соның 406 230 теңгесі өндірілді.
Аталған деректер ішінен 14 қылмыстық іс қозғалып, тергеу амалдары жүргізілуде. Мысалы, «Тасқала» шекара бекетінде ресейлік азаматтың «Лада Ларгус» автокөлігімен 367 дана су шаянын заңсыз алып бара жатқаны анықталып, ҚР ҚК 335-бабы 1-бөлімі бойынша қылмыстық іс қозғалды. Сол секілді Теректі ауданы Қонысай ауылы тұсындағы Солянка өзенінен жеті құралымен 140 дана шаян аулаған 32 жасар азамат ұсталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).