Көкшетауда қаржы пирамидасын құрған екі жігіт 5 жылға сотталды

Ақмола облысының екі тұрғыны Көкшетау қаласында қаржы пирамидасының кеңсесін ұйымдастырып, басқарып отырған. Оларға алданған 40 адам 2021 жылғы қараша мен 2022 жылғы сәуір аралығында 39 миллион теңгесін қаржы пирамидасына салған, деп хабарлайды ҚазАқпарат тілшісі Ақмола облыстық сотының баспасөз қызметіне сілтеме жасап. 

Ведомствоның мәліметінше, қаржы пирамидасын ұйымдастырушыларға Көкшетау қалалық сотында үкім шықты. Іс Қылмыстық кодекстің 217-бабының 3-бөлігі 2-бөлімшесі аясында қаралды. 

Сотта анықталғандай, сотталушылар әлеуметтік желілерде үлкен табыс, саяхат жасау және автокөлік сатып алу туралы ақпаратты белсенді түрде жарнамалаған, презентация, тренингтер өткізіп, азаматтарды компанияға тартқан.

Олар азық-түлік, тауарлар, саяхатшы карталарын сатумен айналысып, азаматтарға тіркелгені үшін ақшалай төлемдер түрінде бонустар ұсынған. Азаматтардың заңды және қаржылық сауатсыздығын, оңай ақша табу ниетін пайдаланып, қарыз, несие алуға итермелеген.

Олардың қылмысы жәбірленушілердің және куәгерлердің айғақтарымен, сотталушылардың тұрғылықты жерін, кеңсесін тінту және тексеру кезінде алынған құжаттар және заттармен, банк құжаттарымен, ақша қозғалысы туралы мәліметтермен, сотталушылардың жәбірленушілермен бетпе-бет ставкасының хаттамасымен, телефонда сөйлесу стенограммасымен және істің басқа да материалдарымен расталды. 

Сотталғандарға жаза тағайындау кезінде сот олардың жасаған қылмысына шын өкінуін, ауырлататын мән-жайдың жоқтығын, бұрын сотталмағанын ескерді.

Тергеу барысында кінәлілер қаржы пирамидасына салынған ақшаны иелеріне қайтарды.

«Сот үкімімен екі сотталушы да ұйымдарда басшылық лауазым атқару құқығынан айырыла отырып, әрқайсысы 5 жылға бас бостандығынан айырылды. Сот үкімі заңды күшіне енген жоқ», — деді Ақмола облыстық сотының баспасөз қызметінен.

Айта кетсек, бұдан бұрын Степногорда мектептің бас бухгалтері бір жылда 36 млн теңге жымқырғанын жазған едік.