1 010 елді мекен су басу қаупіне неғұрлым бейім
НҰР-СҰЛТАН. ҚазАқпарат - 1 010 елді мекен су басу қаупіне неғұрлым бейім. Бұл туралы ҚР ТЖМ Төтенше жағдайлардың алдын алу департаментінің бастығы Рүстембек Әмрин айтты, деп хабарлайды ҚазАқпарат тілшісі.
«Су тасқынының теріс әсерін төмендету мақсатында талдау жүргіздік. Оның нәтижелері бойынша көктемгі су тасқыны кезінде 800 мыңнан астам адам тұратын 1 010 елді мекен су басу қаупіне неғұрлым бейім деп айқындадық», - деді ол Орталық коммуникациялар қызметіндегі баспасөз мәслихатында.
Департамент бастығының айтуынша, Төтенше жағдайлар министрлігі республикалық деңгейде мүдделі министрліктермен және әкімдіктермен бірлесіп, 2021-2023 жылдарға арналған су тасқынына қарсы іс-шаралардың жол картасын әзірледі және іске асырылуын бақылауда. Жол картасы Төтенше жағдайлар, Экология, геология және табиғи ресурстар министрліктерінің, сондай-ақ Индустрия және инфрақұрылымдық даму министрлігінің бірлескен бұрығымен бекітілген.
«Өткен жылы су тасқынына қарсы іс-шаралардың жол картасы аясында 37 іс-шараны іске асыру аяқталды. Бұдан басқа, су тасқынына қарсы іс-шаралар аумақтарды дамытудың кешенді жоспарлары және облыстық су тасқынына қарсы жоспарлар аясында іске асырылуда», - деді Рүстембек Әмрин.
