1,7 млрд теңгені жымқыру фактісі – елордадағы әуежайдың бас бухгалтері тергелуде
НҰР-СҰЛТАН. ҚазАқпарат – Елордада Нұрсұлтан Назарбаев халықаралық әуежайының бас бухгалтері мен әуежайдың тағы бірнеше қызметкері 1,7 млрд теңге сомасындағы қаражатты жымқыру фактісі бойынша тергелуде, деп хабарлайды ҚазАқпарат тілшісі.
«Жүздеген миллион теңгені жымқыру фактілері бойынша бірқатар қылмыстық іс тергеліп жатыр. Мысалы «Нұрсұлтан Назарбаев халықаралық әуежайы» АҚ-ның бас бухгалтері, қызметкерлері мен бірқатар кәсіпкерлерге қатысты іс қаралуда. Тергеу нұсқасына сай, олар Нұр-Сұлтан қаласы бойынша сыбайлас жемқорлыққа қарсы қызметтің лауазымды тұлғаларына қаржы-шаруашылық қызметіне тексеру жүргізбеу мақсатында 16 млн теңге сомасында пара беру және АҚ-ның 1,7 млрд теңге сомасындағы қаражатты жымқыру фактілері бойынша тергелуде», - деді ҚР Сыбайлас жемқорлыққа қарсы іс-қимыл агенттігі Тергеу комитетінің бас тергеушісі Данияр Бекайдаров агенттікте өткен баспасөз мәслихатында.
Қазіргі уақытта күдіктілерге қатысты тергеу амалдары жүргізіліп жатыр.
