1 қыркүйекте 7 мың 690 мектеп есіктерін айқара ашатын болады - Б. Жұмағұлов
АСТАНА. 14 тамыз. ҚазАқпарат - Алдағы 1 қыркүйекте елімізде 7 мың 690 мектеп өз есіктерін айқара ашатын болады. Онда 2,5 млн.-ға тарта оқушылар білім алады.
Бұл туралы бүгін Үкіметте өткен селекторлық кеңесте ҚР Білім және ғылым министрі Бақытжан Жұмағұлов мәлім етті.
Министрдің мәліметіне сүйенсек, 270 мыңнан астам бүлдіршін мектеп табалдырығын алғаш аттап, 1-сыныпқа барады.
«Демографиялық өсім мен көші-қон үдерісі қарқын алып отырған жергілікті жерлерде 5 мың 170 балаға арналған 10 мектеп ашылды. Биыл 596 мектепке 20 млрд. теңгенің күрделі жөндеу жұмыстары қарастырылса, соның 80 пайызының жұмысы аяқталды. Ағымдағы жөндеу 5 мың 953 мектепке қарастырылды. Олардың дайындығы 98 пайызға жетті», - дейді министр. Оның айтуынша, мектептердің жылыту маусымға әзірлігі де жоғары. Мәселен, 6 мың 80 мектеп дербес жүйемен жылытылады. Бұл ретте отынмен қамтамсыз ету 70 пайызды құрайды.
