1 Мамыр мерекесіне орай қазақстандықтар үш күн демалады
«Қазақстан Республикасындағы мерекелер туралы» ҚР Заңына сәйкес, Қазақстан халқының бірлігі мерекесі 1 мамыр күні атап өтіледі. Қазақстан Республикасында мереке күндер демалыс болып табылады, ал демалыс күні мен мереке күндері сәйкес келген жағдайда - мереке күнінен кейінгі жұмыс күні демалыс күні болып саналады. Биыл 1 мамыр жексенбі болғандықтан, Қазақстан халқы бірлігі күні қазақстандықтар 30 сәуірден бастап 2 мамырға дейін демалады.
1 Мамыр - Қазақстан халқының бірлігі күні мерекесі республикада ел Президенті Нұрсұлтан Назарбаевтың жарлығымен 1996 жылдан бері атап өтіліп келеді. Тарихта еңбекшілерді біріктірген айтулы мереке Қазақстан үшін жаңаша мән-маңызға ие болды. Бұл мейрам бүгінде қазақ жерін мекен еткен 130-дан астам ұлт өкілінің тыныштығы мен татулығының нышанына айналды. Елбасының ұсынысы бойынша аталмыш мереке биылдан бастап жаңаша үлгіде атап өтілетін болады. Яғни бұл күні Астанада, барлық облыстар мен қалаларда жергілікті халықтың қатысуымен шерулер ұйымдастырылады.