1 жасар баланы қағып кеткен жүргізуші 20 тәулікке қамалды
АЛМАТЫ. ҚазАқпарат – Алматыда 1 жасар бала мен ер адамды қағып кеткен жүргізуші ұсталды, деп хабарлайды ҚазАқпарат тілшісі.
Қазір Бостандық ауданы полиция қызметкерлері екі адамды қағып кеткен мас жүргізушіге қатысты тергеу амалдарын жүргізіп жатыр.
Қазір осы іске байланысты сот-медициналық, тағы да басқа сараптамалар тағайындалды.
Іс материалдарына сәйкес, жүргізуші мас болған. Мас күйінде көлік тізгіндегені үшін ол 8 жылға көлік жүргізу куәлігінен айрылды.
Одан бөлек, Алматы ауданаралық сотының шешімімен автокөлік иесі 20 тәулікке қамалды. Бұл - тек мас күйінде көлік басқарғаны үшін тағайындалған жаза.
Оқыс оқиға бүгін Вахтангов 2А көшесінде болған еді. Мас жүргізуші ер адам мен 1 жастағы баланы қағып, қашып кеткен.
