1 жасқа дейінгі шетінеген нәрестелер саны 2,6 пайызға азайды

АСТАНА.  15 қазан. ҚазАқпарат -  Биылғы қаңтар-тамызда АХАТ органдарында 257,8 мың жаңа туылған нәрестелер тіркелді.  Бұл туралы бүгін ҚР Статистика агенттігіндегі брифингте аталған ведомствоның басшысы Әлихан Смайылов мәлім етті.

«Ағымдағы жылдың қаңтар-тамызында АХАТ органдарында 257,8 мың жаңа туылғандар тіркелді. Бұл көрсеткіш 2011 жылдың сәйкес кезеңіне қарағанда 3,8 пайызға артық»,-деді Ә. Смайылов.

1 мың адамға шаққандағы туудың жалпы коэффиценті 23 туған нәрестелерді құрайды. Сонымен қатар ведомство басшысы биылғы қаңтар-тамыз айларындағы өлім-жітім саны 97,4 мың адамды құрағанын, бұл көрсеткіш өткен жылдың сәйкес кезеңіне қарағанда 1,5 пайызға төмен екенін атап өтті.

Айта кетейік, 2012 жылғы қаңтар-тамызда республикада 1 жасқа дейінгі 3644 нәресте өлімі тіркелді. 2011 жылғы қаңтар-тамызбен салыстырғанда 1 жасқа дейінгі шетінеген нәрестелер саны 2,6 пайызға азайды.