10 айда Қазақстанның сыртқы сауда айналымы 8,3 пайызға кеміді
АСТАНА. ҚазАқпарат - Ағымдағы жылдың 10 айында Қазақстанның сыртқы сауда айналымы 8,3 пайызға кеміді. Бұл туралы бүгін ҚР Президенті жанындағы Орталық коммуникациялар қызметінде өткен брифингте ҚР Ұлттық экономика вице-министрі Мәдина Әбілқасымова мәлім етті.
«Ағымдағы жылдың 10 айында тауарлар экспорты мұнай мен негізгі металдардың әлемдік бағасының құлдырауы, мұнай, көмір, ферроқорытпалар және алюминий экспорты нақты көлемінің кемуі салдарынан 4,9 пайызға қысқарды», - деді ол.
Вице-министрдің айтуынша, тауарлар импорты да мұнай өнімдері, жеңіл автомобильдер мен олардың қосалқы бөлшектері, жиһаз және кондитерлік бұйымдар импортының азаюы есебінен 14,5 пайызға төмендеген.
«Осылайша, 2013 жылдың сәйкес кезеңімен салыстырғанда сыртқы сауда айналымы 8,3 пайызға қысқарды», - деді М.Әбілқасымова.
