10 айы ішінде Тұлпар-Тальго пойыздарымен барлығы 730 мың жолаушы тасымалданды - ҚТЖ
АСТАНА. ҚазАқпарат - 2014 жылдың 10 айы ішінде Тұлпар-Тальго пойыздарымен барлығы 730 мың жолаушы тасымалданған, бұл 2013 жылдың сәйкес кезеңімен салыстырғанда 41 пайызға артып, вагондардың орташа санына есептегенде 62 пайызды құрады, деп хабарлады «ҚТЖ» ҰК» АҚ баспасөз қызметінен.
Сондай-ақ, компания баспасөз қызметінің хабарлауынша, отандық «Тұлпар-Тальго» зауыты жаңа 23 вагоннан тұратын құрамды рейске дайындап жатыр. Нақтырақ айтқанда, жоспар бойынша, 2 желтоқсан күні №67/68 Астана-Защита пойызы іске қосылмақ. Айта кетейік, ағымдағы жылдың 29 қазанында Тұлпар-Тальго вагондарынан жасақталған құрам Алматы - Өскемен (Защита) бағытына қатынай бастаса, 28 қазанда Тұлпар-Тальго вагондарынан құралған пойыз құрамы Алматы - Шымкент бағыты бойынша жолға шықты. Сондай-ақ, қазіргі уақытта 43/44 Қостанай - Алматы пойызына «фиомалық» мәртебесін беру бойынша жұмыстар жүргізілуде.
