«100 нақты қадам»: Заң үстемдігін қамтамасыз ету сыбайлас жемқорлықты жоюға септігін тигізеді

АСТАНА. ҚазАқпарат - Елбасының бес институционалдық реформасында айқындалғанындай, заң үстемдігін қамтамасыз ету адамның іргелі құқығы мен бостандығын толық қамтамасыз етуге, сыбайлас жемқорлықты тамырымен жоюға, қоғамдық тәртіп пен қауіпсіздіктің салтанат құруына, мемлекеттік билікті шектеуге, әділсот билігінің қалыптасуына септігін тигізетін болады. Бұл туралы бүгін Орталық коммуникациялар қызметінде өткен брифингте «Еуразиялық құқық қорғау орталығы» үкіметтік емес ұйымының өкілі Ермек Абрасулов осылай мәлім етті.

Сарапшының айтуынша, қазақстандық заңнаманың Конституцияға мейлінше сәйкес бола түсуі маңызды.

«Бұл ретте бізде жақсы тетіктер баршылық. Ата заңды құқықтық қорғау субъектісі ретінде Конституциялық кеңес, сот органдары мен басқа да құрылымдары жұмыс істейді. Дегенмен, заң актілерінің көптігі заңнамалардағы қайшылықты тудыратын проблемаға айналуы мүмкін», - деді брифинг барысында Е.Абрасулов.

Оның сөзіне қарағанда, заң үстемдігі доктринасы сот жүйесін жаңа деңгейге жеткізуге септігін тигізетін болады. Осы тұрғыдан алғанда «Еуразиялық құқық қорғау орталығы» ҮЕҰ сарапшылары Президент Нұрсұлтан Назарбаевтың сот инстанцияларын бес сатыдан үш сатыға дейін қысқарту туралы ұстанымын өте дұрыс деп санайды.

«Бұл заңдардың бірізділігін қамтамасыз ететін шара. Ал бұдан кейінгі мәселе - заңдардың біркелкі орындалуы. Бұл ретте сот тәжірибелерін жалпыландыру, сот актілеріне мониторинг жүргізу қажет. Осының арқасында проблемалар айқындалып, заңның біркелкілігі қамтамасыз етілмек», - деді Е.Абрасулов.