12 қыркүйекте Сенат депутаттығына үміткерлер үгіт-насихат жұмыстарына кіріседі
АСТАНА. ҚазАқпарат - 12 қыркүйектен бастап ҚР Парламенті Сенатының депутаттығына тіркелген барлық үміткерлер сайлауалды үгіт-насихат жұмыстарына кірісе алады. Бұл туралы бүгін Орталық сайлау комиссиясында өткен брифингте комиссияның баспасөз хатшысы Венера Жексембекова айтты.
«Сенат депутаттығына үміткерлерді тіркеу 11 қыркүйекке дейін жалғасады, ал 12 қыркүйектен бастап барлық тіркелген үміткерлер сайлауалды үгіт-насихат жұмыстарына кірісе алады», - деді ол.
Айта кетейік, ҚР Парламенті Сенатының депутаттығына үміткерлерді ұсыну 31 тамызда аяқталған болатын. 2 қыркүйектегі жағдай бойынша барлық ұсынылған 88 үміткердің 59-ы облыстар және Астана мен Алматы қалаларындағы сайлау комиссияларынан тіркеуден өтті. Ұсыну қорытындылары бойынша сенаторлық бір мандатқа 5 үміткерден келіп отыр.
