13 жастағы ақтаулық футболшылар Түркиядағы халықаралық турнирдің қола жүлдесіне таласуда
АЛМАТЫ. 30 наурыз. ҚазАқпарат - Бүгін Түркияның Анталия қаласында футболдан өтіп жатқан «Түрік демалыстары» халықаралық турнирінде 2000 жылғы жасөспірімдердің ақтық ойындары өтеді.
Онда қазақстандық үш команда 3-6 орындарға таласуда. Атап айтқанда, Ақтаудың «Каспий» командасы Ресейдің Мәскеу қаласының «ФШМ» командасымен 3-ші орын үшін таласуда. Олар Ресейдің Краснодар қаласының №5 дарынды балаларға арналған балалар мен жасөспірімдер спорт мектебінің оқушыларымен ширек финалда ойынның негізгі уақытында 1:1 есебімен тең түсіп, пенальти арқылы 3:1 болып басым түскен болатын. Алайда жартылай сында Мәсекеудің «Торпедосына» дәл осындай жағдайда есе жіберді.
Ал Алматы қаласының №2 дарынды балаларға арналған балалар мен жасөспірімдер спорт мектебі мен «Қайрат» футбол клубының жас ойыншылары 5-ші орынды сарапқа салуда. №2 мектептің аяқдопшылары ширек финалда Ресейдің Мәскеу облысының «Мастр-Сатурн» командасына 1:2 болып ұтылып, жартылай сында Мәскеу қаласының «Академия Строгина» командасын 2:0 етіп ұтқан болатын. «Қайраттықтар болса мәскеулік «Торпедоға» 2:3 есебімен ұтылып, краснодарлық №5 мектептің оқушыларын 3:2 есебімен жеңген еді. «Мастер-Сатурн» мен «Торпедо» болса енді бірінші орын үшін өзара күш сынасауда.
