15 ақпанда «Қазақстан дауысы» мегажобасының жеңімпазы анықталады
АСТАНА. ҚазАқпарат - «Қазақстан» телеарнасындағы «Қазақстан дауысы» мегажобасы аяқталуға таяп қалды. Жақын арада телекөрермендер жеңімпазды анықтайтын болады, деп хабарлады телеарнаның баспасөз қызметі.
Өткен жексенбіде «Қазақстан» республикалық телерадикорпорациясының веб-порталында ( www.kaztrk.kz ) он-лайн режимде жобаның тікелей эфирін 45 мыңнан астам пайдаланушы тамашалады. Бұл алдыңғы аптадағы көрсеткішпен салыстырғанда 2 есеге артық. Шешуші күн жақындаған сайын тартыс та қыза түсуде.
«Қазақстан дауысы» байқауының финалын «Қазақстан» телеарнасы 15 ақпанда cағат 21.00-де тікелей эфирде көрсетеді, оған төрт үміткер шығады. Орындаушыға қолдау көрсету үшін 3075 номеріне рет саны бар СМС жолдауға немесе 8 80 90 80 30 75 номеріне қоңырау шалуға болады.
Жеңімпаз 5 млн. теңге мен әлемге әйгілі «Universal» дыбыс жазу студиясымен келісімшартқа отыру мүмкіндігіне ие болады.
«Қазақстан» дауысы» жобасы көпшілікке белгісіз талант иелерін халыққа танымал етуді мақсат етеді. «Қазақстан дауысында» ең маңыздысы - дауыс.
Бұл жоба The Voice of Holland (Нидерланды) немесе «Голос» түпнұсқалық форматының қазақстандық нұсқасы ретінде 2013 жылдың жазында басталды. «Қазақстан Дауысы» жобасының алғашқы маусымының жеңімпазы - Қостанай облысының тумасы 27 жастағы Шахаризат Сейдахмет. Орындаушының тәлімгері - Нұрлан Албан.
«Қазақстан Дауысы» 3 кезеңнен тұрады. Бірінші кезең - барлық қатысушыларды тыңдау арқылы әділқазылардың әрқайсысы төрт топ құрады. Екінші кезеңде әр түрлі топтардың мүшелерінен құралған жұптық сайыс өткізіледі. Үшінші кезеңде жеңімпаздарды халық SMS-дауыс беру арқылы анықтайды.
