2,25 млн қазақстандық карантин кезінде табысын жоғалтқаны үшін біржолғы төлем алды
НҰР-СҰЛТАН. ҚазАқпарат – 2 млн 25 мың қазақстандық карантин кезінде табысын жоғалтқаны үшін біржолғы төлем алды, деп хабарлайды ҚазАқпарат ҚР Еңбек және халықты әлеуметтік қорғау министрлігіне сілтеме жасап.
«10 тамыз сағат 09.00-дегі жағдай бойынша шілдеде шектеу шарасын енгізуге байланысты табысынан айырылған жағдайда Мемлекеттік әлеуметтік сақтандыру қорынан біржолғы төлем тағайындауға азаматтардан 2 млн 508 мың бірегей өтініш қабылданды, төлем мөлшері ең төменгі жалақыға – 42 500 теңгеге тең. Төлемді 2 млн 257,3 мың қазақстандық алды, оның ішінде 2 млн 241,6 мың адам тамыз айында карантиннің ұзартылуына байланысты 0,5 ЕТЖ – 21 250 мың теңге мөлшерінде қосымша ақы алды», делінген хабарламада.
2 млн 508 мың өтінімнің ішінде:
– 835,1 мың адам проактивті форматта төлем тағайындауға келісім берген;
– 641 мың адам Egov.kz порталы және telegram-боттар арқылы;
– 381,3 мың адам 42500.enbek.kz порталы арқылы;
– 650,5 мың адам екінші деңгейдегі банктердің мобильдік қосымшалары мен интернет-ресурстары арқылы өтініш берген.
Азаматтардың санаттары бөлінісінде:
– 835,1 мың өтініш бірыңғай жиынтық төлем төлеушілерден келген (проактивті форматта);
– 231,1 мың өтінішті жалдамалы қызметкерлері үшін жұмыс берушілер берген;
– 1 млн 441,8 мың өтініш азаматтардың басқа санаттарынан келіп түсті (жеке кәсіпкерлер, жеке практикамен айналысатын адамдар, азаматтық-құқықтық сипаттағы шарттар бойынша табыс алатын жеке тұлғалар).
Төлем 2 млн 282 мың адамға тағайындалды. Ақшалай қаражат 2 млн 257,3 мың қазақстандыққа аударылды.
Бұған дейін хабарланғандай, Қазақстан аумағында карантиннің 2 аптаға созылуына байланысты МӘСҚ-тан біржолғы төлем алушыларға 0,5 ЕТЖ – 21 250 теңге мөлшерінде қосымша ақы төленеді.
2020 жылдың шілдесінде МӘСҚ-тан біржолғы төлем алған қазақстандықтарға карантиннің ұзартылуына байланысты қосымша ақы автоматты түрде тағайындалады. Қайта өтініш берудің қажеті жоқ.
Өтініш қабылдау 2020 жылдың 1 қыркүйегіне дейін жалғасады.
