20 мың педагог су басқан аймақтарда ерікті болып жүр – министрлік
АСТАНА. KAZINFORM – ҚР Оқу-ағарту вице-министрі Еділ Оспан су тасқыны болған аймақтарда ерікті болып жүрген педагогтар мен психологтар жұмысы туралы айтып берді.
«Педагогтер мен білім саласының барлық қызметкерлеріне айрықша алғыс білдіреміз. Бүгінде білім беру саласының 20 мың қызметкері тасқынға қарсы іс-шараларға ерікті ретінде қатысуда, оның ішінде 10 мыңнан астамы эвакуациялық пункттерде жұмыс істеп жатыр», - деді Еділ Оспан Орталық коммуникациялар қызметінде өткен баспасөз мәслихатында.
Балаларға және зардап шеккендерге психологиялық көмек көрсету мақсатында жергілікті жерлерде 300-ден астам мектеп психологы жұмыс істеуде.
Сонымен бірге, Бала құқықтары жөніндегі уәкілдердің белсенді жұмысы ұйымдастырылған.
«Зардап шеккен елді мекендердегі балалар қажетті оқу-құралдарымен, сондай-ақ қашықтықтан оқу үшін техникалық жабдықтармен қамтамасыз етілді», - деді вице-министр.
Айта кетейік, Оқу-ағарту министрлігі ең көп зардап шеккен аймақтарда тұратын балаларды сауықтыру орталықтарына жіберіп жатыр. Алғашқы лекте Батыс Қазақстан, Қостанай, Ақмола және Ақтөбе облыстарынан 600 бала 11 сауықтыру орталығына қабылданған.
